Lənkəran Ağır Cinayətlər Məhkəməsində xuliqanlıq niyyətilə qəsdən sağlamlığa ağır zərər vurmada təqsirləndirilən Məhəmmədəli Hacızadənin (soyadı şərtidir) cinayət işi üzrə məhkəmə istintaqı başa çatıb.
Hakim Ayşən Vəliyevanın sədrliyi ilə keçirilən prosesdə hökm oxunub.
Məhkəmənin hökmü təqsirləndirilən şəxs 6 il müddətinə azadlıqdan məhrum edilib və o, dərhal məhkəmə zalında həbs olunub.
İttihama görə, hadisə 12 aprel 2024-cü il tarixdə, saat 16 radələrində Cəlilabad rayonu, Göytəpə şəhərində, “Avtovağzal” adlanan ərazinin arxa tərəfində qeydə alınıb.
Belə ki, Məhəmmədəli Hacızadə zərərçəkmiş Mais Vəliyevlə (soyadı şərtidir) mübahisə edib. Bu zaman o, heç bir əsaslı səbəb olmadan, xuliqanlıq niyyəti ilə zərərçəkmiş şəxsin qol nahiyəsindən tutub dartmasını bəhanə edərək, yumruqla Maisin üz nahiyəsinin sağ və sol hissələrinə bir neçə dəfə zərbə vurub.
Nəticədə zərərçəkmiş şəxsə sol gicgah sümüyünün sınığı, sol gicgah-yanıq nahiyəsində və hər iki gözyuvası ətrafında şişkinlik və qançır, sol gözün ağlı qişasında qansızma, sağ gicgah-alın nahiyəsində və sol yanağın selikli qişasında əzilmiş yara xas bədən xəsarətləri yetirilib. Bu xəsarətlər həyat üçün təhlükəli sayılan, sağlamlığa ağır zərər vurmaya aid bədən xəsarətləri kimi qiymətləndirilib.
Məhkəmə istintaqı zamanı Məhəmmədəli Hacızadə elan olunmuş ittiham üzrə özünü təqsirli bilməyib. O ifadəsində göstərib ki, hadisə günü dostu Elçinin yanına çayxanaya gedib və orada Maisi içkili vəziyyətdə görüb: “Mais Elçinin içkisini içdikdən sonra vəziyyəti daha da pisləşdi. Onun qolundan tutaraq çıxıb getməsini dedim. Lakin Mais daşlığa yıxılaraq xəsarət aldı”.
O, hadisə zamanı Maisi vurmadığını, aralarında heç bir ciddi mübahisə olmadığını, hadisənin çayxananın arxasındakı daşlıq ərazidə baş verdiyini söyləyib: “Sonra polis Maisi həmin vəziyyətdə görüb şöbəyə apardı. Daha sonra isə xəstəxanaya çatdırdı”.
Təqsirləndirilən şəxs qeyd edib ki, Mais sonradan ondan pul tələb edib, lakin özü və ailəsi zərərçəkmişə maddi yardım göstərib.
Sonda Məhəmmədəli Hacızadə hadisədən sonra Maislə barışdıqlarını bildirib./pravda.az