"2026-cı ildən iş qrafiklərinin dəyişdirilməsinin təsdiqi və tətbiqini müşahidə edə bilərik".
Stopnarkotik.az xəbər verir ki, bu fikirləri oxu.az-a açıqlamasında Milli Məclisin deputatı Vüqar Bayramov deyib.
Millət vəkili parlamentdə səsləndirilən iş saatlarının dəyişdirilməsi ilə bağlı təklifə münasibət bildirərkən qeyd edib ki, Bakı şəhərinin nəqliyyat infrastrukturunun təkmilləşdirilməsi üzrə 2025-2030-cu illər üçün dövlət proqramında bu məsələ prioritet istiqamətlərdən biri kimi yer alıb:
"Dövlət proqramına əsasən, bu istiqamətdə təhlillərin aparılması və mexanizmin hazırlanması iş qrafiklərinin dəyişdirilməsinin təsdiqinə gətirib çıxara bilər. Növbəti ildən iş saatlarının dəyişdirilməsini müşahidə edə bilərik. Lakin burada sektoral yanaşma mövcuddur. Bəzi sahələrdə işin daha gec və ya daha tez başlaması birbaşa tələbatla bağlıdır. Təbii ki, vacib məqamlardan biri mexanizmin və iş qrafiklərinin düzgün hazırlanmasıdır. Bu addım nəqliyyat sıxlığının azalmasına səbəb ola bilər. Bununla belə, unutmaq olmaz ki, tıxaclar təkcə iş saatları ilə bağlı deyil. Onu da vurğulamaq lazımdır ki, iş saatlarının dəyişdirilməsi bəzi sektorlara tələbi artıra bilər. Bu isə həm sıxlığın azalmasına, həm də iş keyfiyyətinin yüksəlməsinə gətirib çıxaracaq. Sözügedən məsələ iqtisadi baxımdan səmərəlidir. İnkişaf etmiş ölkələrdə və bəzi Avropa İttifaqı (Aİ) dövlətlərində bu mexanizmdən istifadə olunur. Azərbaycanda da növbəti ildən onun təsdiqi və tətbiqi gözləniləndir".
İqtisadçı ekspert Xalid Kərimli bildirib ki, iş saatlarının dəyişdirilməsi ilə bağlı məsələ məcburi olmamalıdır.
Onun sözlərinə görə, iş qrafiklərinin sürüşdürülməsini əsasən dövlət sektorunda tətbiq etmək mümkündür:"Bir çox müəssisələr bir-biri ilə əlaqəli fəaliyyət göstərdiyi üçün eyni saatlarda işləməyə maraqlıdır. Məsələn, bank işləmirsə, həmin vaxt köçürməni həyata keçirmək mümkün olmur. Banklar da həftənin beş günü fəaliyyət göstərir. Ümumilikdə isə sektorlara bu məsələdə sərbəstlik verilə bilər. Qrafiklə bağlı qərarı iş yeri özü verməlidir. Dövlət özəl sektora tələb qoymamalıdır. Qanunvericiliyin tələbi ondan ibarətdir ki, müəssisə işçini həftədə 5 iş günü ərzində 40 saatdan artıq işlədə bilməz. Düşünürəm ki, bu mexanizmi dövlət müəssisələrində tətbiq etmək olar. Lakin müxtəlif saatlarda işə başlamaq müəyyən çətinliklər yarada bilər. Buna görə də təşkilat rəhbəri strukturun xüsusiyyətlərinə uyğun olaraq iş saatlarını özü müəyyən etməli və təsdiqləməlidir. Hazırda özəl sektorda bu praktika mövcuddur. Bəzi müəssisələrdə iş həftənin birinci günü olmur və ya iş saatları günün ikinci yarısında başlayır. Dediyim kimi, bu proses könüllü əsasda həyata keçirilməlidir".